သာလှဦးကဗျာများ

မျောက်ပွဲ

ပန်းကို ဗန်းပြ
ဝခြမ်း နန်းတက် --။

ညီညွတ်ရေး ညီညွတ်ရေး
ပဒရီကျွတ်ပွဲမှာ
မျောက်ကလူဖြစ်
လူဖြစ်သောမျောက်
သစ္စာဖောက် --။

(အောင်သာလူ)

ပိုးမီးစုန်း

တန်းဆောင်ဘုန်းလပြည့်နိ
အာကာထက်မှာ ကြယ်ချေလက်လက်
ဝင်းခြံဒေါင့်မှာ
ပိုးမီးစုန်းလည်းအရောင်ထွက်
မီးပုံးချေပိုင် ပျံလို့တက်
တဖြက်ဖြက် တဖြက်ဖြက် --။

အဆိပ်ခွက်

အချေခါ ကြားနီကျစကား
မျောက်လက်ထဲမှာ သပြာရယှောင် --။

အခု
မျောက်လက်ထဲမှာ
မောက်စ့်ရလားခဗျာ --။

(သာလှဦး)

လမ်းဖောက်သူ (နှင့်) လမ်းလျှောက်သူ

လမ်းဖောက်သူ
ကြိမ်စူးလည်းစူး
သွီးလူးလူး --။

လမ်းလျှောက်သူ
ဘုရားလည်းဖူး
လိပ်ဥတူး --။

(သာလှဦး)

နပျိုးသီးကျာကျာ

နပျိုးသီးကျာကျာ မှည့်လတ်ယာ
ကြာဇံလင်လျှာ ဆိုလတ်ယာ
ထီးနန့်ထမ်းစင် အယင်ယူခ
စံရဖွေ အိမ်နောက်က --။

အိမ်နောက်အိမ်သျှင်
မကျည်းပင် ပင်လီပင်သွတ်
ကပိုင်ရွာမှာ
လီသွတ်သွတ်လေ လီသွတ်သွတ် --။

ဆရာတော်အား ပန်ကြားခြင်း

ဆရာတော်ကို မသီခင်က
ခွီးပုတ်လောက်ကျ ပြောကတ်ပြီးမှ
အခု ငိုပြနီကတ်တေ --။

ဘုန်းကြီးဆိုဝါ နိုင်ငံရေးနန့်
ပဇာဆိုင်လဲ ကဲ့ရဲ့ကတ်ပြီး
အခုမှ ချီကျူးနီကတ်တေ --။

နိုင်ငံရေးလုပ်ချင်ကေ
စစ်တွေကိုမလာကဲ့
မြန်မာပြည်သို့လား
နှင်ထုတ်ထားပြီးမှ
အခု ကြီးရုပ်ထုလို့ ကိုးကွယ်ကတ်တေ --။

သံဝေဂရဖို့ကောင်းပါရေဆရာတော်
နိုင်ငံတကာ ပြည်မြန်မာကို
ချောင်းပေါက်အောင်လားလို့
အာပေါက်အောင် တရားဝှေါပြီးခါမှ
ညောင်ကုန်းကျောင်းနားက အမှိုက်ပုံဘေးမှာ
ဒုံးပေါက်ဆောက်လို့ သီရပါရေ --။

တမလွန်ဘ၀မှာ
အသက်ရှင်လို့ဟိနီသိမ့်ကေ
အေရခိုင်သားအဆွီးတိကို
တခေါက်ပြန်လာလို့
ဆုံးမခလိုက်ပါ ဆရာတော် --။

ရှိဟောင်းပီမူ ရခိုင်အချစ်ရတု

သာကြည်ယုယ
မပျော်ရသည်ကြာလှပြီ အသျှင့်သား
အရွှီသည် ပန်းနှင့်တူစွ
စန္ဒာဖြူသည်
ကြိုးကြာမယ်ထက်ပူ၍
တကြူကြူလွမ်းရုတ
မောင်ကြောင့်ပူဆာ
မခံသာသည်
များစွာဝဋ်ဒုက္ခတည်း --။

ပူခြင်းလှသည်ကြီး၍ပေ
ဦးဂေါင်းထိပ်ပြင်
လက်စုံတင်ကေ
ကျွန်လျှင်ကန်တော့ပေ၏ --။

ကြောင်းခြင်းစစ် မှာလိုက်မည်
စက္ကြာပိုင်သား
မေ့သက်ထားသည်
ရွှီနားတဖန်တည်လော့ --။

ရှိက၀ယ်ကုသိုလ်ဟောင်း
ဘုရားစိန္ဒေ
မြတ်ဗုဒ္ဓေမှာ
ညောင်ရည်ပန်းသာလောင်း၍
ဆုပန်တောင်းပြုခမည်
ကြမ္မာကျိုးစက်
ဒါနဖက်ကေ
မပျက်သစ္စာလွယ်၍
ဤလူ့ပြည်ဤဌာန
မောင်နှင့်အတူ
တောင်းဆုယူကေ
နှစ်ဆူပေါင်းဖော်ကြ၍
အော် - တူတကွသည် နီစိုင်တွင်
အလှယင့်ယူ
ချစ်သူသားဖခင်လည်း
ဝီးရပ်ခွင်သည်တိုင်းတပါး
သူ့တိုင်းပြည်ကို
လားသည်ဤကြောင်းလျားကြောင့်
အို ၀မ်းနည်းသည် စားသောက်မခြီ
ညည့်နှင့်နိသည်
ခြောက်ဆယ်ပေါင်းနာရီတွင်
လွမ်းသက်ဝီညှိုးနှမ
ကမ်ဖာခိုးထူ
မှိုင်းမှိုင်းလူသည်
နှစ်ဆူနီနှင့်လကို
တောင့်တဘိ နီစိုင်တွင်
အချစ်မပြီ
မောင့်သက်ဝီကေ
ဒါလီမောင်ပန်းပင်ကို
လွန်ကြည်ညိုသည်
လူကိုမပြော
ချစ်တေအားကို
မေလျှင်ဝမ်းတွင်ထား၏ --။

ဂြိုးလှညို ရွှီငှက်မ
နိညမဆို
တောမြိုင်ညိုမှာ
ဖိုကိုလွမ်းရို့တ၍
နိည၀ယ်အပြန်ပြန်
နာရီခတ်တွင်
မောင့်ကိုတွက်ကျပြန်ကာ
ကေသာဆံ သျှောင်အုံးလုံး
ပန်းကုံးမဆင်
ဆီမပျင်ကေ
မေလျှင်ဖြစ်နီပါ၏ --။

နှလုံးသည် စိတ်ဝီဆာ
နံသာဆီကြိုင်
ကတိုးရိုင်လည်း
နှမကိုယ်နှင့်ကွာ၍
မောင်ကြောင့်သာ စိတ်ဆိုးညစ်
ပတင်းညိုကေ
လီချိုသလွန်သာက
ငိုစိတ်ဖြစ် နီစိုင်ခါ
ဥသြဖိုးခေါင်
ကုက္ကလောင်ကေ
ဝါရောင်ကျူးမြည်လာလည်း --။

တသင်္ကြန်လွန်လီမြောက်
အို - ရတုတဖန်
ရာသီပြန်ကေ
ဝဿန်မိုးဦးရောက်၍
တောင်မြောက်ရပ်သျှစ်မျက်နှာ
စိမ်းမြညိုဝီ
ကမ်ဖာမြီမှာ
ရီလျှင်အီးမြမြနှင့်
အင်းအိုင်ထဲဖားများစွာ
မစဲအသံ
တကြံကြံသည်
ဝဿန်မိုးကိုခေါ်၍
ထက်အာကာဘုံတရိုး
ကြီးလှအသံ
တညံညံကေ
ရုံလျှင်ဟစ်ကာကြိုး၍
တဖြိုးဖြိုးသွန်းကျလာ
ဝဿန်ရာသီ
မိုးဦးချီသော်
တောင်လီဖျူးကာကာနှင့်
မေလျှင်ရင်လုံးအီး
နဂရစ်တောင်ယောင်
ဝင်းလင်းပြောင်သည်
မေကမပျော်ဘိလည်း --။

တယောက်တည်း မေ့တကိုယ်
ဟိလတ်မနော်
စက်တော်ခေါ်ကေ
မေကမပျော်လိုလည်း --။

တယောက်တည်း လုံးချင်းသာ
ခန်းမဆယ်တောင်
တိုက်ခန်းဆောင်မှာ
မောင့်ကိုယ်ကိုမွှီ၍စမ်း
မောင်ကိုယ်ငွိ
မတွိသောခါ
မေရို့မှာကေ
တုံစွာတချမ်းချမ်းနှင့်
တ,နိုးနိုးကြက်သီးဝှန်
ပူပန်ပျောင်းပျ
မောင့်ကိုတကေ
အလှရင်လုံးနွမ်၍
မိုးသောက်ပြန်ထတုံသောခါ
ဗိမှာန်အိမ်နား
ပန်းစံကားသည်
သစ်ဖျားအခက်မှာကား
ငှက်ရွှီဝါကေ တတွတ်တွတ်
(ရောက်ပျာ ရောက်ပျာ)
တြင်းငြာကေ
ကျူးကာနမိတ်ဖတ်၍
မြည်တမ်းရွတ်သည် ငှက်ရွှီဝါ
နိညမဟူ
မောင့်ချစ်သူလေ
မေဖြူကြားလီပါက
အဂယင့်သာ ဟုတ်စနိုး
ချစ်မိုးစုံလင်
ရာသက်ကြင်သည်
အယင်မောင်ရောက်ဖို့ဟု
လွမ်းစိတ်ဖြစ်နီစိုင်တွင်
ပဉ္စင်တူရိယာ
နှဲခရာကေ
ညီညာတီးမှုတ်ကျင်၍
လွန်ပျော်ရွှင် လူအများ
ဇကြော့ကခြီ
ရုပ်မျိးစီကေ
အညီယိုးဒယားနှင့်
သဘင်များပွဲရံရာ
လက်ဖျားကိုချီ
သူ့သက်ဝီသည်
ကိုယ်စီသားနှင့်လာ၍
မိပျော်ငြားဖသက်နှံ
မောင်ဇံပူဆာ
ဖကိုရှာကေ
မြီမှာလှူးကာပြန်၍
တကြံကြံ ငိုလိုက်လတ်က
အလှယင့်ယူ
မေဖြူစိတ်ပူဆာလည်း --။

ပြောစရာ ဆိုမတတ်
မွီးမိခင်မှာ
ရင်ကိုထုထောင်းသတ်၍
ဖခင်တွက်မည်ကြောင့်
မွီးမေအသက်ပင်
သီလျှင်တော့မည်ဟူ၍
အူသဲခြီ တုံလို့ချိ
ဆီးဝါးဂါထာ
မရသာသော်
ပြင်းစွာလောင်သည့်မီးကို
စောင့်ထိမ်းသည် ငြိမ်းသက်အောင်
စေတနာကေ
မိတ္တာဆွမ်းဖြင့်လောင်း၍
(-- ပီပျောက် --)

တိုင်းရပ်မြီ မိဇ္ဈိမ
မိဘဌာန
ရောက်လတ်သောခါ
နှစ်ပါးမောင်နှံ
ဆရာ့ထံမှာ
ဝပ်စင်းလျှောက်တောင်းပန်၍
ဇေတ၀န်မြတ်ကျောင်းတော်
လုပ်လတ်ပြီးခါ
တိုင်းသူပြည်သား
ကောင်းမှုဖက်ကေ
မိတ္တာရီစက်ချ၍
ဝသုမ်ဒရီမြီစောင့်နတ်
ဘော်သျှင်မနတ်လူဗြဟ္မာ
ကောင်းချိမ့်ပြုကေ
နတ်လူသာထုခေါ်စီသောဝ်လည်း --။

(နာမည်မသိ စာဆို)

မျည်းမတ်တိ

လူဆိုစွာ
ကမ္ဘာကိုမှီ (23 1/2) ဒီဂရီ
အောက်ခြီကပင် တိမ်းစောင်းနီရေလတ် --။

ဖြတ်လမ်းလိုက်လူလိုက်
နဖူးသိုက်တူးလူက တူးပနာ
မာနကိုခ၀ါချ
ခံယူချက်ကို ဆီးဆိုး
မိုးခါးရီ သောက်လူကသောက် --။

တယောက်
နှစ်ယောက်
သုံးယောက်
ရွီမလောက် --။

ကျောက်ဆောင်ကို အားကျ
ဂျောင်ထဲက ဖွဲရာကျချေတရွီ
ဆကြွီဒဿနတိနန့် ကျင်ကိုင်
သီအိုရီမှိုတက်တိနန့် လံဆွဲယင်း
လိုင်ကြောတင်းရေလို့ ဆိုချင်ဆို
အပိုမဟိရေ သိက္ခာတချပ်ကို
အလိုဟိရေ ရိက္ခာတနပ်မျိုဖို့
အချိုသကာရှာ ပုရစ်မျက်နှာတပိုင်းနန့် 
သမိုင်းဘင်းဂျီ မခံနိုင် --။

(လှိုင်း ဂစ္ဆပ)
(ရွက်နုပြန်ချိန်ကဗျာများ)
Free4Arakan.Blogspot.Com မှ ပြန်လည်ကူးယူဖော်ပြသည်။

ကိုယ့်လူသီသင့်ရေ

သက္ကရာဇ်ကို မွားမျို
သိက္ခာကို ရောင်းစား
အနှစ်မဲ့စကားနန့် တည်ဆောက်
ကိုယ့်အရိပ်ကို ကြောက်နီရေကိုယ့်လူ
တခြားသူတိကို ဒူးထောက်အောင်
စွမ်းဆောင်နိုင်စွာ အဆန်းလား --။

အလုပ်မလုပ်ဘဲ
အသျှတ်ကိုတော့ခါ
သျှတ်သထက်သျှုတ်အောင်လုပ်
မဟုတ်စွာတိနန့် နှောင်ဖွဲ့
ကဲ့ရဲ့မှုနန့် ခင်းကျင်း
အမုန်းပြတင်းပေါက်မှာ
ရန်မူဖို့ရာ ရှောက်လို့နီ --။

ကိုယ့်လူ၏မသေချာမှုက
တခြားလူတိကို တွေဝေစီရေ
တပါးသူတိကို
ငလိငလည်ဖြစ်စီရေ
အဂယင့် ဆန်းစစ်ကြည့်ကေ
(အမှန်ဗျာယ်) ကိုယ်လူသီသင့်ရေ --။

ဘစောတင်
(ရခိုင့်လွတ်လပ်ရေးစာစောင်မှ)

ဇတ်လမ်းကို အဆုံးသတ်ခန်း

ထောင်တည်မော်ကွန်းသူရဲ

အဖွဲ့အစည်းတခု၏နယက
အကြံပီးအရာဟိကြီးပ
ရုတ်တရသီဆုံး
သျှင်လူအားလုံး
ယူကျုံးမရ နှမြိုးတသ
အဖရခိုင်ပြည်၏
သားကောင်းရတနာကြယ်မွန်
အချိန်မတန်ခင်
ကွယ်လွန်စွာစော
အကျွန်ုပ်ရို့အား
ကြောခိုင်းလားဗျာယ်
ဘစောင်ပျင်လို့ ရက်စက်စွာလဲ
ခေါ်ကေလည်းမထူး
ငိုကေလည်းမကြား
ဥပက္ခေတရားနန့်
မရဏရထားစီးလို့
ကျွတ်လားခဗျာယ် ---။

အလေးပြုကတ်
ရပ်စောက်ရပ်ကတ်
ဂေါင်းညွတ်ဂုဏ်ပြု
(၃) မိနိလောက်
ကောင်းရာသုဂတိ လားစီဖို့ ---။

ဆရာကြီးရေ
စာသမား ပီသမား
ဘာသာရေးသမား
စာဟောဆရာကြီး
ဘိန္ဓောယမ်းကု
စွယ်စုံရ ပါရမီသျှင်
မျိုးချစ်ပုဂ္ဂိုလ်
နိုင်ငံရေးသမား တော်လှန်ရေးသမား
လူအများက နာမကင်းပွန်း
အမွှမ်းတင်ခေါ်ဝေါ်
ဒေါ်လာသန်း (၅၀၀)
(Project) ဆရာကြီး ---။

ဆရာကြီးချန်ခ
ဂျောင်ထဲက အညတရ
တေတ္တာတလုံး
ပုလဲကုံးရတနာ
အဿပြာသိန်းသန်း
နီမြန်းသော ပတ္တမြား ---။

ဖွင့်ကြည့်သောအခါ
နွမ်းရိကြီမွ မှိုတက်လျှက်
အ၀တ်စနန့်ထုပ်ပိုး
ပိုးထိုးကြွက်ကိုက်
လက်နှိပ်စက်မူ ဆောင်းပါးတပုဒ်
မဂ္ဂဇင်းတအုပ်က
ကော်ပီကူးထားစွာ ---။

၎င်းအပြင်
စာလုံးမပီမပြင်
(Type) ရိုက်ထားသော
ဘာသာပြန်တမူ ---။

ဆရာကြီးသည်
စာပီကို အသက်ထက်မြတ်နိုး
တန်ဖိုးထား၏ ---။

ဂျောင်ထိုးသိမ်းထား
ကြွက်ကိုက်စား၏ ---။

မည်သူမည်ဝါ
အသူပင်လာတောင်းတောင်း
မပီး ---။

အာဂပုဂ္ဂိုလ် ခေသူမဟုတ်
သို့အတွက်ကြောင့်
(အကြံပီးကြီး - နယကကြီး)
ကောင်းချီးကင်းပွန်း
အမွှမ်းတင်ကျူး
ရွာဦးနတ်ပိုင်ယှောင်
ပူဇော်ပသ ကိုးကွယ်ရစွာ ---။

ဆရာကြီးမြတ်နိုး
တန်ဖိုးထားသော
ပြည်တန်ပတ္တမြား
(ထောင်တည်မော်ကွန်း) ကို
ဆရာကြီးစီးရာ
သင်္သရာရထားလားရာ
တဖ၀ါးမကွာ ကပ်လျှက်ပါဖို့
အလောင်းနန့်ခေါင်း
ကျမ်းဟောင်းမော်ကွန်း
ဇတ်လမ်းသုံးပွင့်ဆိုင် ---။

နောက်နိညဥ့်
ရက်လည်ဆွမ်းမကျွေးရသိမ့်ခင်
သက်ဆိုင်ရာ
အဖွဲ့အစည်း (၂) ခု၏ယုန်းခန်း၌
ထောင်တည်မော်ကွန်း
သူရဲခြောက်သည်ဟူ၏ ---။

(မယုံလျှင် စုံစမ်းပါ။)

ရခိုင်သားလေ ရင်လီးရေ

အောက်အီးအီးတွန်သော ၀ံလက်

ရခိုင်သားနိုင်ငံရေး

ပြောခါ လွတ်လပ်ရီး
လုပ်ခါ ဖွတ်ချီး --။

ပြောခါ ဒီမိုကရေစီ
လုပ်ခါ လီမိုကရေစီ --။

ပြောခါ လူ့အခွင့်အရေး
လုပ်ခါ သူ့အခွင့်အရေး --။

ပြောခါ ညီညွတ်ရေး
လုပ်ခါ နဖူးကွဲ ဒူးပြဲ --။

အယင်ခါ ကျင်သန်
အခု နရန်းလန် --။

အတိတ်နှင့် ပစ္စုပ္ပန် (၃)

သမိုင်းကို ပြန်ရွီးဖို့အစား
သမိုင်းကို ဖန်တီးကတ်မည် --။

(သာလှဦး)

သုံးသပ်ခြင်း

အဝေသူငယ်ချင်း
မင်းလည်းရခိုင် ငါလည်းရခိုင်
ငါရို့တိမှာ ဖျောက်သင့်စွာက
ဆင်းရဲသူ လူမဟုတ်
ပုဇွန်ဖြူငါးမဟုတ်
ဆင်းရဲကေနှိမ် ရတတ်ကေမုန်း
အကြံတူ ရန်သူ ကိုယ့်ထက်သာမကြိုက်
ဒေပိုင်စိတ်ထား အတ္တများနန့်
အများကြိုက်နှစ်
ဇာမျိုးချစ်လည်းမဖြစ်နိုင် --။

(ဦးသာမောင်)

စိတ်ဓါတ်

ငါကား ဒေမြို့၊ သူကား ထိုရပ်
မင်းကား ထိုမြီ၊ ငါကား ဒေရွာ
မခိုင်စိတ်ဓါတ်၊ ကွဲပြိုကတ်ကေ
ရက္ခဒေမြီ၊ လေးဝတီသည်
ဝါးစည်းပြီယှောင် ပြိုလိမ့်မည် --။

(ထွန်းစိုးခိုင်)

အနာ

ပစကတော့ ဝေသာလီ
လက်မှာတော့ ၀ီစကီ --။

(သဇင်မြီ သန့်နိုင်)

အတိတ်နှင့်ပစ္စုပ္ပန် (၂)

အယင်ခါ မဟာ
အခု လဘာဂျာ --။

(သာလှဦး)

တလင်္ဂုနီ တလင်္လာ
နိမြတ်ရက်ရာဇာ --။

င်္အဂါ ဗုဒ္ဓူး
ရွှီမြို့မြောက်ဦး အောင်သံကျူး --။

ကြသားပတီး သောက်ကြာ
စည်တော်လည်းတီး မင်္ဂလာ --။

စနီ နဂါးမောက်
အခေါင်မိုးသို့ရောက် --။

 သာလှဦးဘလော့ လားဖို့ နှစ်ပါ